7 mias shimplí ón tír is gaire don ghrian

I gcomparáid lena chuid comharsana ar fad, tá Eacuadór sách beag (cé go bhfuil sé fós 4 oiread chomh mór le hachar na hÉireann). Mar sin féin, tá go leor éagsúlachta le fáil sa bhia ann. Níorbh iad na nithe casta na rudaí ba mhó a chuaigh i bhfeidhm orm, áfach, ach na bealaí simplí inar úsáideadar na bun-chomhábhair leis an leas is fearr a fháil astu. 

Casabe

Tá a chúinne beag féin den Amasóin ag Eacuadór agus tá treibheanna bundúchasacha ina gcónaí ann go fóill. Bhí an t-ádh orm cuairt a thabhairt ar cheann acu agus an próiseas déantúsaíochta casabe (arán réidh déanta as yuca) a fheiceáil. An rud a bhí spéisiúil faoin eispéireas seo ná go bhfaca mé ní hamháin an chaoi a ndéantar an t-arán féin, ach d'fhoghlaim mé cén chaoi a ndéantar an fearas ar fad as na hacmhainní nádúrtha atá ar fáil dóibh sa dufair.

As cré ó bhruach na habhann, bailithe agus an abhainn íseal sa séasúr tirim, a rinneadh an mhias chócaireála. As téada déanta as plandaí ón gcoill a rinneadh an líontán leis an leacht a bhaint as an yuca. As gas crainn a rinneadh an losaid le hé a bhailiú. As trádairí stáin a rinne na gratálaithe (maith go leor, seans nach ón bhforaois a tháinig an ceann deireanach sin ach bhíodh sé de nós acu tráth crann lán cealg a úsáid). Bhí an t-arán féin go deas; brioscánach agus blasta. 

Melcocha

Tá leaganacha cosúil leis an milseán seo coitianta sna Stáit Aontaithe, mar a dtugtar taffy air. Ansin bíonn innill chasta acu leis an mbunábhar a shíneadh. Cloítear níos mó leis an seanmhodh déantúsaíochta in Baños in Eacuadór agus an melcocha, mar a thugtar air ansin, á dhéanamh acu. Tógtar an carn trom donn a dhéantar tríd an leacht on gcána siúcra a laghdú agus caitear an lá ar fad á shíneadh ar chruach ar an mballa i ndoras an tsiopa féin os comhair an tsaoil.

Tá an milseán féin go deas agus cuirtear blas sa bhreis air uaireanta le píosaí beaga de rudaí eile nó le spíosraí cosúil le cainéal. Má tá fiacail scaoilte ort, áfach, ní mholfainn é nó beidh tú gan í go gasta.  

Humita

Is mó seans gur chuala tú trácht ar tamale, ná ar humitas. Tá siad mórán mar an gcéanna ach humita a thugtar ar an mias i Meiriceá Theas agus tamale a thugtar air i Meiriceá Láir. Is éard atá ann ná arbhar meilte agus measctha le hoinniúin, gairleog, cáis, uachtar, uibheacha agus uaireanta rudaí deasa eile agus é ar fad ceangailte i mbeart déanta de scil an arbhair féin agus cócaireáilte i ngal. Is minic a itear iad le cupán caife mar bhricfeasta. Táid breá fóinteach agus blasta freisin.

Llapingacho

Baineann llapingacho go dlúth le ceantar na Andes in Eacuadór. Baineann siad usaid as na prátaí áille acu le cineál de cháca práta nó slamar donn a dhéanamh. Seo atá acu ar thaobh gach pláta in áit na arepas atá níos coitianta sa Chólóim nó na tortillas atá acu i Meiriceá Láir. Gan amhras, agus mé chomh tógtha le prátaí thaitin siad go mór liom. 

Seacláid the le cáis 

Seo nós nach bhfuil mé cinnte an maith liom é. Go minic le cupán de sheacláid the tabharfar bata cáise duit. Cé go raibh mé in amhras bhí léite agam go raibh tú in ainm is é a leagan isteach sa deoch agus scaoileadh leis leá. Rinne mé amhlaidh agus mé ag súil go meascadh sé ar bhealach draíochtach éigin leis an leacht. Níor mheasc agus ní raibh de thionchar aige ar an deoch ach beagáinín íle a bheith le sonrú ar an mbarr.

Agus an tseacláid the ólta agam bhí carn de cháis leáite fágtha i mbun an chupáin agus d'itheas sin ag ceapadh gur anseo a bheadh an t-iontas deas ach arís ní raibh aon tionchar sonrach ag an tseacláid ar an gcáis agus, cé go raibh sé go deas, ní fhaca mé gurbh fhiú é a bheith istigh. Ní dóigh liom gur nós é seo atá chun earnáil na ndeochanna teo a athrú ó bhonn go luath. 

Corvina  

Ní haon mhias neamhghnách é seo agus ar bhealach is é sin an rud is fearr faoi. D'itheas an t-iasc seo, corvina (doingean mara) i dteannta le prátaí, popcorn agus ceviche sa mhargadh in Quito. Ba é an t-iasc domhainfhriochta ab fhearr a bhí agam riamh i mo shaol. Bhí an t-iasc féin álainn feolmhar, sailleach agus úr. Bhí dath donn-ór foirfe ar an bhfuidreamh a bhí leis agus é álainn brioscánach. Bhí mé sna flaithis! 

Cuy

Is mó trácht a chloistear ar cuy agus daoine ag labhairt faoi Pheiriú de bharr go mbíonn níos mó turasóirí ag tarraingt ar Cuzco agus Machu Picchu ach táid á ithe fud fad na Andes, ón mBolaiv go dtí Eacuadór, leis na cianta. Is mó seans go bhfeicfeá cócaireáilte ar an mbarbaiciú iad. Tá blas orthu rud beag cosúil le sicín agus níl mórán feola orthu, de réir mar a thuigim. Níor thriail mé sa deireadh iad agus an praghas orthu dírithe ar thurasóirí a bhfuil pócaí níos doimhne acu ná mo chuid féin.

Ar an iomlán thaitin bia Eacuador liom. Agus úsáid á baint acu as an dollar uilechumhachtach ní raibh na praghsanna chomh hoiriúnach céanna don bhuiséad teann is a bhí i dtíortha eile, ach thaitin an úsáid a bhaineadar as a gcuid bun-chomhábhar go mór liom, mar aon leis an meas a léiríodar orthu.